Guðrún Hannesdóttir hlaut Ljóðstaf Jóns úr Vör 2007 fyrir ljóð sitt, Offors, en Hjörtur Marteinsson og Eiríkur Örn Norðdahl viðurkenningar fyrir sitt ljóðið hvor í árlegri samkeppni um ljóðstafinn. Tilkynnt var um úrslitin og skáldunum afhent verðlaun og viðurkenningar við hátíðlega athöfn í Salnum í Kópavogi síðdegis á sunnudag.

Um 400 ljóð bárust í samkeppnina að þessu sinni, en rökstuðningur dómnefndar fyrir veitingu ljóðstafsins í ár er svohljóðandi:„Ljóðið Offors lýsir jurt sem sumir kalla illgresi, en er þó matjurt sem runnin er upp í fjarlægum heimshluta nálægt vöggu menningarinnar og fylgt hefur Íslendingum um langan aldur. Mynd þessarar jurtar í ljóðinu er dregin á listrænan hátt sem sækir í íslenska alþýðuhefð. Jafnframt lýsir Offors óstýrilátu eðli rabarbarans og lífsseiglu og býður í lokin upp á fleiri en eina túlkunarleið að hætti margra nútímaljóða.“

„Ljósmynd: Morgunblaðið/Golli“